sabayang bigkas :: MPs 10

Ang mundong ito ay puno ng mga desisyon
Tila nasa isa kang kumunoy
Hinahatak kang pababa ng buong-buo
Magpupumiglas ka ba para lalong malugmok?
Sasarilihin mo ba ang pagsubok na ito?

Sa puyat at gutom na yata ako matutuluyan
Paano, kailangan kong pag-aralin pati ang mga kapatid ko
Suwerte ko na nga lang at isa ako sa iilang nakakapag-aral dito
Na may baong bente pesos pang-alis sakit ng tiyan!
Basta, itong edukasyon ang gamot sa matindi naming kagutuman
Kaya’t nag-aaral ako para sa summa cum laudeng magbibigay tagumpay!
Bibigyan ko ng kape si bituka nang makakayod ng walang humpay
Di ako gagaya sa kanila na inaasawa na lang ng makukunat na Kano!
Kaya hoy, sa kumportable niyong mundo diyan sa Luzon, pasali naman
Penge naman ng kaunting libro, ng malasakit, para sa amin dito sa Mindanao


Ano ba ‘tong buhay na ‘to?
Bitin sa kita, maski dala-dalawa na ang trabaho
Di na ako makapaghintay na umuwi’t makita
Ang aking anak na puno ng pagmamahal at saya
Mawala na lahat—pamilya, kaibigan, kanyang ama
Kami ng supling ko, ‘di mawawala sa tabi ng isa’t isa
Kakayanin ko lahat, ni makipagpatintero kay kamatayan
Para lamang sa anak ko at sa kanyang kinabukasan
Isa ako sa mga kumakayod na magulang, wala akong asawa
Oo mahirap, ikaw, subukan mong bumuhay ng isang bata


Lagi na akong nahuhuli sa trabaho
Baka malintikan na ako ni bossing ko
Tuwing nag-aabot, may kita at, siyempre, toma na ‘to
Huwag lang maispatan ng parak, naaaning na kasi ako
Yung natitirang pera napupunta naman sa aking pamilya
Itong pagtambay ko ginagawa ko lang para kumita
Nagtatago na lamang ako sa totoong mundo
Sobra na kasi iyong saklap na pinagdaanan ko
Pusher ako, at ikinahihiya ko ito
Dahil paninira ng buhay ang trabaho ko


Halos wala na akong maihain sa hapag-kainan
Ni perang pampakopya ng retrato ng aking nawawalang anak, wala akong mailabas
Sa kabila ng aming pagdurusa, napangiti ako ng mga numero
Lalo na pag naririnig ko na ‘tong umaalog sa isang baso
Umaasa akong sa di numerong papel aasenso ang aming buhay
Kaunting tulong na rin sa asawa kong maliit ang puhunan
Pangarap ko’y magtayo ng tindahan ng gulay o mag-OFW sa Dubai
Marahil ay titigil na rin akong tumaya at mamiso balang araw
Isa akong mambibingo, at aaminin kong nalululong ako
Dahil sa walang trabaho, napilitang isugal ang piso


Naging madamot nga ako, sinasarili ang problema
Pero tumigil ka ba para ako’y silayan?
Kailangan kita para makaahon ako sa kumunoy ko
Kailangan mo din ako para matuto ka sa pagkakamali ko
Talaga ngang ang mundong ito ay puno ng desisyon.

____________________

11feb10

-sabayang bigkas para sa Malikhaing Pagsusulat 10

patungkol sa mga "human tendencies", as concluded by Reis :P

This is done by the collective efforts of Andrea Escudero, Benjamin Esguerra, Ara Janelle Foronda, Ruth Ibarrientos, Margaret Garde. Special mention to Reis Luke Aquino (for converting his 2PM to 6PM). :D